لاہور کی انسدادِ دہشت گردی عدالت نے جناح ہاؤس حملہ کیس میں بانی پی ٹی آئی کی بہن علیمہ خان کے بیٹے، شاہ ریز کی ضمانت پر فیصلہ محفوظ کر لیا ہے۔
سماعت کے دوران وکیل رانا مدثر نے مؤقف اختیار کیا کہ شاہ ریز پر کارکنوں کو اکسانے کا الزام عائد کیا گیا، مگر مکمل تفتیش اور جیو فینسنگ کے باوجود اس کے خلاف کوئی ثبوت سامنے نہیں آیا۔ وکیل کے مطابق چالان میں تمام تفصیلات درج ہیں، لیکن شاہ ریز کا کہیں ذکر موجود نہیں، نہ ہی کسی تفتیشی افسر نے اس کے خلاف کوئی بیان دیا ہے۔ ان کا کہنا تھا کہ ملزم کی والدہ محض اپنے بیٹے کی رہائی کے لیے آواز بلند کر رہی ہیں اور اس آواز کو دبانے کے لیے گرفتاری عمل میں لائی گئی۔
جج نے وکیل سے کہا کہ وہ دلائل جلد مکمل کریں کیونکہ انہیں جیل جانا ہے، ورنہ باقی دلائل جیل سے واپسی پر دیے جائیں۔ سرکاری وکیل نے مؤقف اختیار کیا کہ بیانِ حلفی کی تصدیق ابھی تک نہیں ہو سکی، جبکہ شاہ ریز کے دوستوں کے سوشل میڈیا سے تصاویر حاصل کی گئی ہیں، مگر اس کے اپنے اکاؤنٹ پر کوئی مواد موجود نہیں۔ لہٰذا ضمانت کی درخواست مسترد کی جائے۔ عدالت نے دونوں جانب سے دلائل مکمل ہونے کے بعد فیصلہ محفوظ کر لیا۔
تھانہ سرور روڑ پولیس نے جناح ہاؤس حملہ کیس میں شاہ ریز خان کے خلاف مقدمہ درج کر رکھا ہے۔
تازہ ترین خبروں کے لیے پی این آئی کا فیس بک پیج فالو کریں
