دریاؤں میں سیلاب کا خدشہ، الرٹ جاری

پنجاب کے دریاؤں میں سیلابی صورتحال برقرار ہے اور 5 ستمبر تک دریائے راوی، ستلج اور چناب میں انتہائی اونچے درجے کے سیلاب کا خدشہ ظاہر کیا گیا ہے۔

فلڈ فورکاسٹنگ ڈویژن کے مطابق دریائے چناب میں تریموں، دریائے راوی میں بلوکی اور سدھنائی جبکہ دریائے ستلج میں ہیڈ سلیمانکی پر اونچے درجے کا سیلاب جاری ہے۔ ستلج میں بہاؤ 5 لاکھ 16 ہزار کیوسک تک پہنچ گیا ہے اور اس میں مسلسل اضافہ ہو رہا ہے۔ ریلیف کمشنر کے مطابق بالائی علاقوں میں بارشوں کے باعث دریاؤں کے بہاؤ میں مزید غیر معمولی اضافے کا خدشہ ہے۔

فلڈ فورکاسٹنگ ڈویژن نے بتایا کہ تربیلا ڈیم اپنی گنجائش کے 100 فیصد جبکہ منگلا ڈیم 83 فیصد بھر چکا ہے۔ تربیلا ڈیم کا لیول 1549.78 فٹ اور منگلا ڈیم کا 1226.50 فٹ ریکارڈ کیا گیا ہے۔ علاوہ ازیں، راول ڈیم میں پانی کی سطح 1751.70 فٹ تک پہنچنے کے بعد اسپل ویز کھول دیے گئے ہیں۔ این ڈی ایم اے کے مطابق اسپل ویز صبح 7 بجے کھولے گئے اور متعلقہ اداروں کو پیشگی آگاہ کر دیا گیا تھا۔

این ڈی ایم اے نے مزید کہا کہ اسپل ویز کھلنے سے کورنگ نالہ میں پانی کا بہاؤ بڑھ گیا ہے، اس لیے عوام کو ہدایت کی گئی ہے کہ تیز بہاؤ کی صورت میں نالہ یا اس پر بنے عارضی پل عبور نہ کریں۔