اسلام آباد ہائیکورٹ میں ڈاکٹر عافیہ صدیقی کی صحت اور وطن واپسی سے متعلق ڈاکٹر فوزیہ صدیقی کی درخواست پر سماعت کے لیے بننے والا نیا بینچ بھی ٹوٹ گیا۔
جسٹس انعام امین منہاس نے درخواست پر سماعت کی اور ریمارکس دیے کہ یہ کیس سنگل بینچ کے بجائے لارجر بینچ سنے گا، اس لیے فائل چیف جسٹس کو بھیجی جا رہی ہے۔ اس سے قبل جسٹس سردار اعجاز اسحاق نے وزیراعظم اور کابینہ کو عدالتی حکم عدولی پر توہین عدالت نوٹس جاری کیے تھے، تاہم کیس ان کی عدالت سے منتقل کر کے جسٹس انعام امین منہاس کے پاس بھیجا گیا تھا۔
سماعت کے دوران وکیل عمران شفیق ایڈووکیٹ نے کہا کہ معاملہ پیچیدہ ہوگیا ہے، جس پر جسٹس انعام نے ریمارکس دیے کہ ایسا نہیں، اصل سوال یہ ہے کہ “ماسٹر آف روسٹر” چیف جسٹس ہیں یا نہیں۔ جسٹس انعام امین منہاس نے وضاحت کی کہ اس معاملے پر دو مختلف آرا موجود ہیں، اس لیے فیصلہ اب لارجر بینچ کرے گا۔ بعدازاں عدالت نے چیف جسٹس کے ماسٹر آف روسٹر ہونے کے نکتے پر لارجر بینچ تشکیل دینے کا فیصلہ کرلیا۔
تازہ ترین خبروں کے لیے پی این آئی کا فیس بک پیج فالو کریں
