اسلام آباد: آزاد کشمیر کی سیاست میں بڑی پیش رفت سامنے آئی ہے، مسلم لیگ (ن) نے حکومت سے علیحدگی کا باضابطہ اعلان کر دیا۔
صدر مسلم لیگ (ن) آزاد کشمیر، شاہ غلام قادر نے کہا کہ ان کی جماعت کسی غیر فطری حکومت سازی کا حصہ نہیں بنے گی اور اب اپوزیشن میں بیٹھے گی۔ انہوں نے واضح کیا کہ اگر پیپلز پارٹی تحریک عدم اعتماد لاتی ہے تو یہ اس کا جمہوری حق ہے، تاہم مسلم لیگ (ن) کسی نئی حکومت میں شامل نہیں ہوگی۔ شاہ غلام قادر کا کہنا تھا کہ جو رہنما پارٹی پالیسی سے انحراف کرے گا، اس کے خلاف کارروائی کی جائے گی۔ ان کے مطابق نئی حکومت کا قیام صرف شفاف عام انتخابات کے ذریعے ہی ممکن ہے۔
انہوں نے مزید کہا کہ مسلم لیگ (ن) آزاد کشمیر مہاجرین اور بیرون ملک مقیم کشمیریوں کی فلاح و بہبود کے لیے سرگرم رہے گی اور آئینی و سیاسی بحران کے حل میں مثبت کردار ادا کرتی رہے گی۔ آخر میں شاہ غلام قادر نے اعلان کیا کہ نواز شریف اور شہباز شریف کی قیادت میں بھرپور انتخابی مہم چلائی جائے گی۔
تازہ ترین خبروں کے لیے پی این آئی کا فیس بک پیج فالو کریں
