لاہور (پی این آئی) دفاعی چیمپئن لاہور قلندرز کو عبرت ناک شکست، کوالی فائر 1 جیت کر ملتان سلطانز مسلسل تیسرے سال پی ایس ایل فائنل میں پہنچ گیا۔ تفصیلات کے مطابق ملتان سلطانز نے پاکستان سپر لیگ 8 کے واحد کوالی فائر میں دفاعی چیمپئن لاہور قلندرز کو باآسانی شکست دے دی۔
ملتان سلطانز کی جانب سے دیے گئے 161 رنز کے ہدف کے تعاقب میں لاہور قلندرز کی ٹیم صرف 76 رنز پر پویلین لوٹ گئی، یوں رضوان الیون 84 رنز سے فتح حاصل کر کے ٹورنامنٹ کے فائنل میں پہنچ گئی۔ملتان سلطانز نے اس فتح کے ساتھ مسلسل تیسرے سال پی ایس ایل کے فائنل کیلئے کوالی فائی کیا گیا ہے۔ ایچ بی ایل پی ایس ایل 8 کے کوالیفائر میں ملتان سلطانز نے لاہور قلندرز کو کامیابی کے لیے 161 رنز کا ہدف دیا تھا ۔قذافی سٹیڈیم ،لاہور میں کھیلے جارہے اس میچ میں ملتان سلطانز نے ٹاس جیت کر لاہور قلندرز کے خلاف پہلے بیٹنگ کرنے کا فیصلہ کیا۔سلطانز کے بلے بازوں نے محتاط کھیل کا مظاہرہ کیا اور پاور پلے میں بغیر کوئی وکٹ گنوائے 46 رنزبنائے۔ ایسے میں لاہور قلندرز نے حارث رؤف اور راشد خان کی زبردست گیند بازی کی بدولت واپسی کی۔
حارث رؤف نے 53 کے مجموعے پر گزشتہ میچ کے سنچورین عثمان خان کو بولڈ کیا، انہوں نے 29 رنز کی اننگز کھیلی۔ ان کے بعد ایونٹ کے ایک اور سنچورین رائیلی روسو صرف 13 رنز کے مہمان ٹھہرے، انہیں زمان خان نے کیچ آؤٹ کروایا۔90 کے مجموعے پر راشد خان نے ایونٹ میں سب سے زیادہ رنز بنانے والے محمد رضوان کو بولڈ کردیا، رضوان نے 33 رنز بنائے۔ سلطانز کا اسکور 15 اوورز کے اختتام پر جب 97 رنز تھا، ایسے میں کیرون پولارڈ نے 34 گیندوں پر 57 رنز کی اننگز کھیلی کر ٹیم کے ٹوٹل کو ڈیڑھ سو کا ہندسہ عبور کروایا۔ آخری اوور میں کیرون پولارڈ اور خوشدل شاہ کو حارث رؤف نے بولڈ کرکے سلطانز کے اسکور کو بریک لگائی۔سلطانز کے ٹم ڈیوڈ 22 رنز کے ساتھ ناقابلِ شکست رہے۔
ملتان سلطانز نے مقررہ 20 اوورز میں 5 وکٹوں کے نقصان پر 160 رنز بنائے۔ لاہور قلندرز کی جانب سے حارث رؤف نے 3 وکٹیں لیں جبکہ راشد خان اور زمان خان نے ایک ایک آؤٹ کیا۔ ٹاس کے موقع پر گفتگو کرتے ہوئے ملتان سلطانز کے کپتان محمد رضوان کا کہنا تھا کہ کوالیفائر میں اپنی بہترین ٹیم کھلانے کی کوشش کی ہے۔لاہور قلندرز کے کپتان شاہین شاہ آفریدی کا کہنا تھا کہ ہم بھی پہلے بیٹنگ کرنا چاہتے تھے۔ آخری میچ میں نوجوان کھلاڑیوں کو موقع دیا تھا۔ لاہور قلندرز کی ٹیم نے گروپ میچز میں 14 پوائنٹس کے ساتھ ٹاپ کیا تھا جبکہ ملتان سلطانز کی ٹیم 12 پوائنٹس اور بہتر رن اوسط کے باعث پوائنٹس ٹیبل پر دوسری پوزیشن پر رہی۔
محمد رضوان ملتان سلطانز کی کپتانی کر رہے تھے جبکہ دیگر کھلاڑیوں میں عثمان خان، رائیلی روسو، کیرون پولارڈ، ٹم ڈیوڈ، خوشدل شاہ، انور علی، اسامہ میر، عباس آفریدی، شیلڈن کوٹریل اور احسان اللّٰہ شامل تھے۔شاہین آفریدی کی قیادت میں میدان میں اترنے والی لاہور قلندرز فخر زمان، طاہر بیگ، عبداللّٰہ شفیق، سیم بلنگز، حسین طلعت، سکندر رضا، ڈیوڈ ویسا، راشد خان، حارث رؤف اور زمان خان پر مشتمل تھی۔
