کویت میں گاڑیوں کی لازمی انشورنس پالیسی کے لیے نئے قوانین کے نفاذ کا وزارتی حکم نامہ جاری کر دیا گیا ہے۔ کویتی میڈیا کے مطابق نائب وزیر اعظم اور وزیر داخلہ شیخ فہد الیوسف نے حکم نامہ نمبر 2116 جاری کیا، جو ٹریفک حادثات کی صورت میں شہری ذمہ داری سے متعلق انشورنس کے نظام کو منظم کرتا ہے۔
قوانین کا عنوان Compulsory Insurance for Kuwaiti Vehicles رکھا گیا ہے۔ حکم نامے کے مطابق ضمیمہ 1 میں شامل دستاویز کا ٹیمپلیٹ اس وقت تک استعمال کیا جائے گا جب تک کوئی نیا ریگولیٹری فیصلہ جاری نہیں ہوتا، جبکہ انشورنس پالیسی کی قیمتیں ضمیمہ 2 میں بیان کردہ نرخوں کے مطابق ہوں گی۔
آرٹیکل 3 کے تحت انشورنس ریگولیٹری یونٹ کو مجاز انشورنس کمپنیوں کی ایک منظور شدہ فہرست تیار کرنے کی ذمہ داری دی گئی ہے، جو انشورنس پالیسیوں کے اجراء اور فہرست میں شامل ہونے کی شرائط کی نگرانی کرے گا۔
آرٹیکل 4 یونٹ کو یہ اختیار دیتا ہے کہ وہ تعمیل کی نگرانی کرے، شکایات وصول اور حل کرے، اور متعلقہ قوانین اور ضوابط کے مطابق تمام قانونی اقدامات کرے۔
آرٹیکل 5 میں کہا گیا ہے کہ جنرل ڈائریکٹوریٹ آف ٹریفک گاڑیوں کے لائسنس جاری یا تجدید نہیں کرے گی اگر انشورنس دستاویز نئے فیصلے کی شرائط پوری نہیں کرتی۔
یہ فیصلہ کویت میں لائسنس یافتہ انشورنس فراہم کنندگان کے درمیان لازمی گاڑی انشورنس کے عمل کو بہتر بنانے، ریگولیٹری نگرانی کو مضبوط کرنے اور قانون کی مکمل تعمیل کو یقینی بنانے کے لیے کیا گیا ہے۔
تازہ ترین خبروں کے لیے پی این آئی کا فیس بک پیج فالو کریں
